Feillər - Keçmiş zaman

Fars dilində feillərin lüğət forması (məsdər) nun (ن) hərfi ilə bitir. Əgər biz bu hərfi yazıdan silsək həmin feil üçüncü şəxsin təkində keçmiş zaman ifadə edir. Məsələn:رفتن (rəftən) feilindən nun hərfini silsək, o, رفت (rəft) şəklinə düşəcək və "getdi" mənasını verəcək. İndi isə "rəftən" feilin şəxs əvəzlikləri ilə birgə işlənməsini nəzərdən keçirək:

من رفتم	Mən rəftəm	Mən getdim
تو رفتی	To rəfti	Sən getdin
او رفت	U rəft	O getdi
ما رفتیم	Ma rəftim	Biz getdik
شما رفتید	Şoma rəftid	Siz getdiniz
آنها رفتند	Anha rəftənd	Onlar getdilər

Hər iki dildə verilmiş nümunələri müqayisə edib görə bilərik ki, Fars dilində sadəcə "ن" hərfini atmaqla keçmiş zaman düzəldə bildik, amma Azərbaycan dilində "mək" məsdər əlamətini atmaq feilin keçmiş zamanı yox əmr şəkli yaranır. Yalnız "-dı⁴" keçmiş zaman şəkilçisin artırdıqdan sonra keçmiş zaman şəklini ala bilirik. Verilmiş fərqlə yanaşı hər iki dildə ortaq xüsusiyyət kimi feilin keçmiş formasına şəxs sonluqları əlavə olunaraq onları şəxs əvəzlikləri ilə əlaqələndirilir.

Azərbaycan dilində olduğu kimi Fars dilində də danışarkən şəxs əvəzliklərini ötürsək, məna itməz. Yəni əgər "Mən rəftəm" "Mən getdim" deməkdirsə, elə "Rəftəm" də "Getdim" deməkdir.

من نان خریدم	Mən nan xəridəm	Mən çörək aldım
ما انشا نوشتیم	Ma enşa neveştim	Biz inşa yazdıq
تو قول دادی	To ğol dadi	Sən söz verdin
پدر من آب خواست	Pedər e mən ab xast	Atam su istədi
معلم یک پرسش پرسید	Moəllem yek porseş porsid	Müəllim bir sual soruşdu

---

Lüğət

رفتن	rəftən	getmək
نان	nan	çörək
خریدن	xəridən	almaq
نوشتن	neveştən	yazmaq
قول دادن	ğol dadən	söz vermək
دادن	dadən	vermək
خواستن	xastən	istəmək
پدر	pedər	ata
پرسیدن	porsidən	soruşmaq
پرسش	porseş	sual
یک	yek	bir