Gələcək zaman

Fars dilində də Azərbaycan dilində olduğu kimi qeyri-müəyyən və qəti gələcək zaman mövcuddur. Azərbaycan dilində qeyri-müəyyən gələcək zaman -ar² şəkilçisi ilə, qəti gələcək zaman isə -acaq² şəkilçisi ilə düzəlir. Qeyri-müəyyən gələcək zamana nümunə: gələrəm, oxuyarsan, danışarsınız. Qəti gələcək zamana nümunə: gələcəksən, oxuyacaqsan, danışacaqsınız.

Fars dilində qeyri-müəyyən gələcək zamanın quruluşu indiki zamanın quruluşu ilə eynilik təşkil edir. Bu iki zamanı yalnız cümlə daxilində bir-birində fərqləndirmək olar. Əgər indiki zamanla bağlı dərslərimizi oxusanız, eyni feilin tərcüməsini hər iki zamanda verdiyimizi görə bilərsiniz. Həmin dərslərə keçidlər: İndiki zaman və İndiki zaman + idi: gəlirdim, deyirdim.

Bu dərsdə qəti gələcək zamanı öyrənəcəyik. Fars dilində qəti gələcək zamanlı cümlələr  خواستن [xastən] - istəmək feilinin köməyi ilə qurulur. Qəti gələcək zaman qurmaq üçün  خواستن [xastən] feilinin indiki zaman kökü خواه [xah] uyğun şəxslərlə uzlaşdırılaraq istifadə olunur, cümlənin əsas feili isə şəxsə görə dəyişmədən keçmiş zaman kökü ilə işlədilir.

Mən gələcəyəm	Mən xahəm aməd	من خواهم آمد
Sən qapını açacaqsan	To dər ra xahi baz kərd	تو در را خواهی باز کرد
Sabah yağış yağacaq	Fərda baran xahəd barid	فردا باران خواهد بارید
Biz sabah qabları yuyacağıq	Ma fərda zərfha ra xahim şost	ما فردا ظرفها را خواهیم شست
Siz hər şeydən xəbərdar olacaqsınız	Şoma əz həme çiz ba xəbər xahid bud	شما از همه چیز با خبر خواهید بود
Onlar heç vaxt bunu bilməyəcək	Anha hərgez in ra nəxahənd danest	آنها هرگز این را نخواهند دانست

Qeyd: خواستن [xastən] feili gələcək zaman formalaşdıran köməkçi feildən əlavə cümlənin əsas feili qismində də çıxış edə bilər:

İstəyirəm səni görüm/görəm	Mixahəm to ra bebinəm	می خواهم تو را ببینم
Nə eləmək istəyirsən?	Çe kari mixahi bekoni	چه کاری میخواهی بکنی
Ürəyim heç bir iş görmək istəmir	Deləm nemixahəd kari konəd	دلم نمی خواهد کاری کند